सुरेश प्रभूंना पुन्हा केंद्रीय मंत्रिमंडळात संधी…?

0
1377

नवी दिल्ली : दि. ०४ : केंद्रीय मंत्रिमंडळाचा विस्तार होण्याची शक्यता असून, सध्या वगळण्यात आलेले माजी केंद्रीय मंत्री सुरेश प्रभू यांचा मंत्रिमंडळात समावेश केला जाण्याची दाट शक्यता येथील राजकीय वर्तुळातून व्यक्त करण्यात येत आहे. हा संभाव्य विस्तार १५ दिवसांत होण्याची शक्यता आहे. सुरेश प्रभू यांनी मोदी सरकारच्या पहिल्या मंत्रिमंडळात रेल्वे, वाणिज्य अशी दमदार खाती सांभाळली होती. सध्या ही खाती पीयूष गोयल यांच्याकडे आहेत. मात्र, प्रभू यांच्याकडे रेल्वेसारखे थेट जनतेशी संपर्क येणारे खाते असूनही त्याचा राजकीय लाभ ते पक्षाला मिळवून देऊ शकले नाहीत, अशी तक्रार त्यांच्याविरोधात केली गेल्यामुळे प्रभू यांना दुसऱ्या मंत्रिमंडळात स्थान मिळाले नाही, अशी चर्चा आहे. मात्र, सध्या अर्थव्यवस्था घसरणीला लागली आहे. त्यामुळे प्रभूंसारख्या आर्थिक विषयातील जाणकार मंत्र्याची उणीव भासत असून, त्यामुळेच त्यांना मंत्रिमंडळात पुन्हा सामावून घेण्याचे घाटले जात आहे, अशी माहिती या घडामोडींची माहिती असलेल्या विश्वसनीय सूत्रांनी दिली. प्रभू पेशाने सनदी लेखापाल (चार्टर्ड अकाउंटंट) आहेत. ते मूळचे शिवसेनेचे नेते, पण मोदींच्या पहिल्या मंत्रिमंडळात समावेश करण्यासाठी अगदी ऐन वेळी त्यांना भारतीय जनता पक्षात सामावून घेण्यात आले होते. प्रभू अटल बिहारी वाजपेयी यांच्या मंत्रिमंडळातही मंत्री होते. त्यावेळी नद्या जोड प्रकल्पासाठी त्यांनी केलेल्या उल्लेखनीय कामामुळेच त्यांना मोदींच्या पहिल्या मंत्रिमंडळात स्थान मिळाले होते. अर्थव्यवस्थेचे गाडे रूळावर आणण्यासाठी संबंधित क्षेत्रातील तज्ज्ञांना मंत्रिमंडळात स्थान देण्याची पंतप्रधान मोदी यांची इच्छा असल्याचे बोलले जात आहे. त्यामुळेच प्रभूंसारख्या आर्थिक क्षेत्रातील जाणकाराला पुन्हा मंत्रिमंडळात स्थान देण्याचे घाटत आहे. केवळ संबंधित विषयातील तज्ज्ञ असल्यामुळेच एस. जयशंकर यांना मोदी मंत्रिमंडळात थेट परराष्ट्रमंत्री म्हणून स्थान मिळाले आहे.

LEAVE A REPLY

Please enter your comment!
Please enter your name here